شيء من بعيد بيبان بشر
كتبهاالدكتور أحمد يونس. المهنة: مؤذن في مالطة. مـحل السكن: قــلب العـاصفة. تاريخ الميلاد: لم يأت بعد. ، في 6 مارس 2007 الساعة: 10:31 ص
الدكتور أحمد يونس يكتب:
شيء من بعيد بيبان بشر
ينفع ماريكا وعبد السلام.
وبرضه ينفع ساعات ريهام.
وساعات بينفع ليليان كوهين،
ويا المعارضة ومع النظام.
من ده لدي، ومن دي لده!
ينفع كده وينفع كده!
تشوفه ساجد، تفتكره ماجد،
وهو سوسو فْ لحظة مزاج.
وتقول: حيضرَب، أتاريه بيهرَب،
ويخش تاني فِ حالة انبعاج.
يبان مخيمر، وهو نشوة،
مِرات حسام اللي كان عبير.
على طول بيزأرـ، مع إنه لبوة!
يا دوب تخنفر تحت السرير.
ينفع فانلة وينفع كولون،
وجزمة ميري أكبر مقاس.
ويليق جونلة أو بنطلون
ضيق مِبين حز اللباس.
بضهره نسخة من بمبة كشر،
وفْ وشه حاجة من جورج بوش.
ونِفسه يشبه فِ الصورة تاتشـر،
أو حتى هتلر، ما يهمهوش.
وفيه ملامح من الخديوي،
وهو عامل فيها النديم.
شكله النهارده عبده الحامولي.
وبكره يبقى عبد الحليم.
للصبح يسهر. ياكل ويسكر.
أصل المدام بتجيب دولارات.
الشلة تحضر والرغي يكتر.
والليل يحب التجليات.
حاكم الكرنب مفعوله جامد،
بالذات فِ فقع النظريات.
ويبان مِركز، وهو واخد
تعسيلة مِ القرن اللي فات.
أوقات بييدي على عبدوفيسكي.
وفجأة جونسون ينقح عليه.
شوية فودكا وشوية ويسكي.
ما دام بلاش، أوكيه يا بيه.
الصبح مدحت والضهر ميرفت.
وفِ العصاري عامل مجاري.
ولما ييجي المسا بيشحت،
عشان يداري على اللي جاري،
طول ما اللواري بتشحن فياجرا،
لا بد هو تبقاله حصة.
ناضورجي بانجو وحشيش وبودرة.
ويقول: بادون أفكار لقصة.
أيام بعمة وجبة وكاكولا.
وهُبة يقلب محمدوف.
يبان ساعات راعي الطفولة.
كده أو كده، حسب الظروف.
ثوري وحكيمة تسرق يوماتي
مِ القصر أكل العيانين.
تربي ومفكر وكمان آلاتي،
وزعيم بيخطب في الفلاحين.
أبحاث وياما أشعار، دراما،
قصص، أغاني، نازل طبيخ.
مسرح وسيما ونكت قديمة.
وساعات بيلعب أستاذ تاريخ.
إدوه تفرغ جوه الحظيرة.
وفاز بجايزة: صحفي لطيف.
وباني جامع ورا المنيرة.
وبار برخصة فِ شارع شريف.
شحات وباشا ومخبر عتيد.
وبياخدوا رأيه فِ نادي باريس.
شريك في حزب مالوش رصيد.
ضد الحكومة ومع الرئيس.
مرشد سياحي ومرشد بوليس.
وبرضه مرشد فْ جماعة تانية.
كان اشتراكي وبقى رأسمالي.
يا دوب بياخد فِ النطة ثانية.
نوع مِ المربى وماركة سيجار.
بس الشهادة: فارس خطير!
سمسار محبة وتاجر آثار.
لكن شجاعته مالهاش نظير.
في مرة هاجم مسئول كبير.
ما خافش منه وبهدل كرامته.
فرش الملاية لخالة بكير
جار بنت عمة سواق سـيادته.
على كفه ولع حياته شمعة.
"هل من مبارز؟" ضحكوا وسابوه.
شتم موظف فِ درجة سابعة.
وجرِي استخبا لا يمسكوه.
من ده لِدي، ومن دي لِده.
ينفع كده وينفع كده.
تسألني: مين دا؟ ما اعرفش ارد.
شيء من بعيد بيبان بشر.
وباء فظيع داير يعض.
طب كنا فين لما انتشر؟
طب كنا فين لما انتشر؟
الدستور / الأربعاء 21 فبراير 2007
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
