الدكتور أحمد يونس يكتب:
الأرض بتطرح أطفال
خدوا بالكو يا أطفال العالم.
يا كل الأطفال في العالم.
خدوا بالكو عشان نحمي العالم.
من أعداء كل الأطفال.
نحميه م الغول الهربان.
م القمقم وبقاله زمان.
بيدمر ف مدن وغيطان.
مش فاضل غير الأطفال.
الأرض بتطرح أطفال.
أطفال غير كل الأطفال.
أطفال من كل الأعمار.
جم مع فيضان الأنهار.
كبرم ف مواسم الأمطار.
واندفعوا زي الشلال.
الأرض بتطرح أطفال.
أطفال غير كل الأطفال.
حضاناتهم متاريس وخنادق.
ولعَبْهم ديناميت وبنادق.
في عينيهم أحزان العالم.
على عالم خان الأطفال.
الأرض بتطرح أطفال.
أطفال غير كل الأطفال.
حواديتهم مافيهاش لا قصور.
ولا مصباح سحري ولا بخور.
ولا كنز في قلعة جدرانها من تحت لفوق بالبنور.
حواديتهم بالروح عايشينها.
عايشين أيامها وسنينها.
مش حد بيحكلهم عنها.
هم ف حواديتهم أبطال.
بستان بيروت الجنوبية.
ـــــــــــــــــــــــــــــــــــــــــــــــــــــــــ
التصنيفات : غير مصنف |
